29 Я́коже сконча́ша вся, я́же о Нем пи́сана, сне́мше с дре́ва, положи́ша во гро́бе.
30 Бог же воскреси́ Его́ от ме́ртвых.
31 И́же яви́ся на дни мно́ги совозше́дшим с Ним от Галиле́и во Иерусали́м, и́же ны́не суть свиде́телие Его́ к лю́дем.
32 И мы вам благовеству́ем обетова́ние, бы́вшее ко отце́м, я́ко сие́ Бог испо́лнил есть нам, ча́дом их, воздви́г Иису́са.
33 Я́коже и во псалме́ второ́м пи́сано есть: Сын Мой еси́ Ты, Аз днесь роди́х Тя.
34 А я́коже воскреси́ Его́ от ме́ртвых, не ктому́ хотя́ща возврати́тися во истле́ние, си́це рече́: я́ко дам вам преподо́бная Дави́дова ве́рная.
35 Те́мже и в друго́м глаго́лет: не да́си Преподо́бному Твоему́ ви́дети истле́ния.
36 Дави́д бо у́бо своему́ ро́ду послужи́в, Бо́жиим сове́том у́спе, и приложи́ся ко отце́м свои́м, и ви́де истле́ние.
37 А Его́же Бог воздви́же, не ви́де истле́ния.
38 Ве́домо у́бо да бу́дет вам, му́жие бра́тие, я́ко Его́ ра́ди вам оставле́ние грехо́в пропове́дается; и от всех, от и́хже не возмого́сте в зако́не Моисе́ове оправди́тися,
39 О сем всяк ве́руяй оправда́ется.
40 Блюди́те у́бо, да не прии́дет на вас рече́нное во проро́цех:
41 Ви́дите, неради́вии, и чуди́теся, и у́зрите и исче́знете: я́ко де́ло Аз соде́лаю во дни ва́шя, ему́же не и́мате ве́ровати, а́ще кто пове́сть вам.
42 Исходя́щим же им от со́нмища Иуде́йска, моля́ху язы́цы в другу́ю суббо́ту глаго́латися им глаго́лом сим:
43 Разше́дшуся же собо́ру, после́доваша мно́зи от Иуде́й и чести́вых пришле́ц, Па́влу и Варна́ве, и́же глаго́люще им, увеща́ху их пребыва́ти в благода́ти Бо́жией.
44 Во гряду́щую же суббо́ту ма́ло не весь град собра́ся послу́шати сло́ва Бо́жия.
45 Ви́девше же Иуде́и наро́ды, испо́лнишася за́висти и вопреки́ глаго́лаху глаго́лемым от Па́вла, сопроти́в глаго́люще и хуля́ще.
46 Дерзну́вша же Па́вел и Варна́ва реко́ста: вам бе ле́по пе́рвее глаго́лати сло́во Бо́жие: а поне́же отверго́сте е́ и недосто́йны творите́ са́ми себе́ ве́чному животу́, се обраща́емся во язы́ки.
47 Та́ко бо запове́да нам Госпо́дь: положи́х Тя во свет язы́ком, е́же бы́ти Тебе́ во спасе́ние да́же до после́дних земли́.
48 Слы́шаще же язы́цы ра́довахуся и сла́вляху сло́во Госпо́дне, и ве́роваша, ели́цы учине́ни бя́ху в жи́знь ве́чную.