4 Стяза́шеся же на со́нмищах по вся суббо́ты и препира́ше иуде́и и е́ллины.
5 И я́коже снидо́ста от Македо́нии Си́ла же и Тимофе́й, тужа́ше ду́хом Па́вел, свиде́тельствуя иуде́ом Иису́са бы́ти Христа́.
6 Проти́вящимся же им и ху́лящим, отря́с ри́зы своя́, рече́ к ним: кровь ва́ша на глава́х ва́ших, чист аз, отны́не во язы́ки иду́.
7 И преше́д отту́ду, прии́де в дом не́коего и́менем Иу́ста, чту́ща Бо́га, ему́же хра́мина бе вскрай со́нмища.
8 Крисп же нача́льник собо́ра ве́рова Го́сподеви со всем до́мом свои́м, и мно́зи от Кори́нфян слы́шавше ве́роваху и креща́хуся.
9 Рече́ же Госпо́дь в виде́нии нощно́м Па́влу: не бо́йся, но глаго́ли и да не умо́лкнеши,
10 Зане́ Аз есмь с тобо́ю, и никто́же приложи́т озло́бити тя, зане́ лю́дие суть Ми мно́зи во гра́де сем.
11 Седя́ше же та́мо ле́то и ме́сяц шесть, учя́ в них сло́ву Бо́жию.
12 Галлио́ну же анфипа́ту су́щу во Аха́ии, нападо́ша единоду́шно Иуде́и на Па́вла и приведо́ша его́ на суди́лище,
13 Глаго́люще, я́ко проти́ву зако́ну сей увещава́ет челове́ки чти́ти Бо́га.
14 Хотя́щу же Па́влу отве́рсти уста́, рече́ Галлио́н ко Иуде́ем: а́ще бы непра́вда была́ ка́я или́ де́ло зло́е, о, Иуде́е, по сло́ву послу́шал бых вас.
15 А́ще ли же стяза́ния суть о словеси́ и о и́менех и о зако́не ва́шем, ве́дите са́ми: судия́ бо аз сим не хощу́ бы́ти.
16 И изгна́ их от суди́лища.
17 Е́мше же вси Е́ллини Сосфе́на нача́льника собо́ра, бия́ху пред суди́лищем: и ни еди́но о сих Галлио́ну раде́ние бысть.
18 Па́вел же, еще́ пребы́в дни дово́льны и целова́в бра́тию, отплы́ в Сири́ю [и с ним Аки́ла и Приски́лла], остри́г главу́ в Ке́гхреих: обре́кся бо бе.
19 Приста́ же во Ефе́се и тех оста́ви та́мо, сам же вшед в со́нмище, стяза́шеся со Иуде́и.
20 Моля́щим же им его́ на мно́го вре́мя пребы́ти у них, не изво́ли,
21 Но отрече́ся им, глаго́ля, я́ко подоба́ет ми вся́ко пра́здник гряду́щий сотвори́ти во Иерусали́ме: па́ки же возвращу́ся к вам, Бо́гу хотя́щу. И отвезе́ся от Ефе́са: Аки́ла же и Приски́лла оста́ша во Ефе́се.
22 И соше́д в Кесари́ю, возше́д и целова́в це́рковь, сни́де во Антиохи́ю.
23 И сотво́рь вре́мя не́кое, изы́де, проходя́ поря́ду Галати́йскую страну́ и Фриги́ю, утвержда́я вся ученики́.