(Л. 443 об.) Не послушая же увещания сего и прошения мерности нашея, аще отселе впрочее начнет кто[1142] противное деяти, за прещением от самаго Бога, и святых апостолов, и[1143] отец соборне и по особне изреченным[1144], мы таковаго погибели не винни[1145]: еже бо[1146] должни бехом сотворити – сотворихом, долг свой отдахом, слово Божие возвестихом – сие убо есть наш долг. Кийждо же сам о себе узрит в час исхода души своея и в День Страшнаго Суда Божия и воздаяния, комуждо по делом его. Непослушания бо сынове – сынове суть погибели, на няже, по святому апостолу, грядет гнев Божий[1147].

Вам же, священным всем архиереем, архимандритом, игуменом, протопресвитером, иереем глаголю и завещаваю аз, отец ваш и архипастырь, не от себе, но от прежних святых отцев изем: вас же, кийждо в[1148] своей пастве и париссии или приходе, яже имате дети духовныя и прихожаны, наказуйте я́ не вдатися в сицевый странный и чюждый нехристианский обычай, еже власы растити и кудри ухищренми творити, наипаче же таймичищныя, си есть чюждыя накладныя власы налагати, (Л. 444) брады брити и тафии носити, но научайте я́ и вразумляйте сих[1149] всех ошаяватися и отбегати, чюждему бо какову обычаю последуя, на шесть лет запрещается по 83 канону Великаго Василия[1150]. Аще же кто за ненаказанный юностный обычай прежде сего нашего завещания поползнется в сие пребеззаконство, таковаго, наказавше, покаявшася удобно приемлите в сообщение. По сем же нашим наказанием и увещанием аще кий будет гордостно и упорно творящии власорастение, и брадобритие, и тафионошение, сего нашего увещания, паче же самаго Бога завещания, и святых апостол, и отцев всех вышепомянутых, и иных, за мношество и не помяненных[1151], заповедания, и вашего наказания не слушающии, – таковым не сообщайтеся[1152], и святыни всякия лишайте тыя[1153], яко прежднии святии патриарси соборне изрекоша и судиша[1154], дондеже от того престанут и совершенно со слезами, и моленми, и иными благодеянми истинно покаются. Не бо моя суть сия словеса, яко и пред рех[1155], но преждних святейших первопрестолников Всероссийских соборная изречения[1156] и суждения, заимствованая от древних святых отец, имже и аз (Л. 444 об.) всячески должен последовати и таяжде возвещати. Аще же вы отныне будете таковым послабляти[1157] или ласкати[1158], стыдящеся лиц силных и велмож, или ради прибытка мшелоимнаго, или инаго ради какова пристрастия, вы подлежати будете из чина[1159] священнаго извержению, а они – отлучению. Да не вашего ради[1160] нерадения и послабления, а оных непослушания Имя Божие похулится! Не восхощите убо погибнути с грехи чюждими, но добре пасуще кийждо паству свою, и по силе талант Владыце своему приплодивше, мзду от Богатодавца да наследите, жизнь вечную и Царство Небесное восприимете, еже буди всем нам, поучающим вы.