Канопішце – замак эрцгерцага Франца Фердынанда ў Чэхіі.

…не варта было нам адбіраць у іх Боснію і Герцагавіну. – У 1908 годзе Аўстра-Венгрыя анексіравала Боснію і Герцагавіну.

…панам Люкені, які праткнуў нашу нябожчыцу Альжбету… – Луіджы Люкені 10 верасня 1898 г. забіў аўстрыйскую імператрыцу Лізавету, жонку Франца-Іосіфа I.

…пачалі з дзядзькі. – Швейк памыляецца: Франц Фердынанд быў пляменнікам, а не дзядзькам Франца-Іосіфа I.

…адвезлі ў кашы, каб ачомаўся. – У часы Аўстрыйскай манархіі п’яных адвозілі ў ручным вазку – кашы.

…памятаеце, як у Партугаліі падстрэлілі іхняга караля? – У Лісабоне 1 лютага 1908 г. быў забіты партугальскі кароль Карл I, які вызначаўся надзвычайнай паўнатой.

…што напісаў…Віктор Гюго… калі расказаў, як адказала старая напалеонаўская гвардыя ў бітве пры Ватэрлоо. – Напалеонаўская гвардыя на прапанову англічан здацца адказала словам: «Merde! (Дзярмо!) Гвардыя памірае, але не здаецца».

Панкрац – турма для палітычных зняволеных, размешчаная ў Празе, і раён той жа назвы.

…быў звязаны «казлом». – Гэтае пакаранне ў аўстра-венгерскай арміі было такім: вінаватаму салдату прывязвалі рукі да ног і ў такім стане пакідалі ляжаць на працягу дня і болей.

Младачэх – член чэшскай буржуазнай партыі.