Concilium Romanum a. 465.

Concilium Romanum

Quadraginta octo episcoporum, sub Hilario Papa

Flauio Basilico et Herminerico uiris clarissimis cosulibus, sub die decimo quinto Kalendarum Decembrium, residente uiro uenerabili Hilaro papa in basilica sanctae Mariae, et Maximo Taurinae ciuitate prouinciae Gallicarum, Ingenuo Ebredunensi prouinciae suprascriptae, Mediolanensi prouinciae suprascriptae Saturnino Auinionensi prouinciae suprascriptae, Petro Portuensi, Paulino Aquaeuiuensi, Primo Atellano, Palladio Salpinati, Gaudentio Albigensi, Sotere Neapolitano, Tiburtio Capuano, Gaudentio Scyllaceno, Felice Lucensi, Eubodio Tifernensi, Eusebio Senensi, Maioriano Astensi, Iuste Faventino, Felice Sipontino, Concordio Barino, Verano… Caprario Cassitano, Ianuario Praenestino, Constantino Aquinati, Adeodato Cumano, Praetextato Interamnino, Tiberio Curium Sabinorum, Claudio Puteolano, Gerontio Camerino, Adeodato Veliterno, Lucifero Trium Tabernarum, Crispiano Subaugustano, Romano Albanensi, Seruodei Nomentano, Florentio Clusino, Hilaro Amerino, Candido Tiburtino, Paulo Foronouano, Eusebio Sutrino, Apuleio Tarquiniensi, Gaudentio Antiatino, Asterio Gabinate, Proiectitio Nepesino, Asterio Foroiuliensi, Philippo Numanate, Gaudentio Vecconensi, Restituto et Octavio Afris; residentibus etiam uniuersis presbyteris, adstantibus quoque diaconibus, Hilarus episcopus ecclesiae catholicae urbis Romae synodo praesidens dixit:

I. Canones Nicaeni uel apostolicae sedis decreta custodiantur

Quoniam religiosus Sancto Spiritu congregante conuentus hortatur, ut quaecumque pro disciplina ecclesiastica necessaria sunt cura diligentiore tractemus: si placet, fratres, ea quae ad ordinationum tenorem pertinent iuxta diuinae legis praecepta et Nicaenorum canonum constituta ita adiuvante domino in omne aevum mansura solidemus, ut nulli fas sit sine status sui periculo uel diuinas constitutiones uel apostolicae sedis decreta temerare; quia nos, qui potissimi sacerdotis administramus officia, talium transgressionum culpa respiciet, si in causis dei desides fuerimus inuenti, quia meminimus quod timere debemus qualiter comminetur dominus (Ezech. 3:26) negligentiae sacerdotum, siquidem reatu maiore delinquit qui potiore honore perfruitur, et grauiora facit uitia, peccatorum sublimitas dignitatum.

II Ut bigami aut uiduae aut corruptae mariti ad ecclesiasticos gradus non accedant.

Cauendum ergo imprimis est, ne ad sacratos gradus, sicut gestis prioribus ante praescriptum est, quisquam qui uxorem non uirginem duxit aspiret; repellendus est etiam quisque qui in secundae uxoris nuptias contra apostolica praecepta conuenit.