Тхо цкъа а ца гIиртина нахана новкъа,

Кхечеран маршо а лийрина оха.

ГIийлачун, мискачун гIодина оха,

ХIай паччахь, дитахьа тхо машape даха…

Вукху шина цIарна уллорниш а хIокхарна тIегулбелира. Йуьхьанца доьхна доладелла илли, цхьа гушвоцчу дирижеран куьйгаллина кIел дахча санна, низаме деана, Iаннашца, аьрцнашца кхерстира.

Герз буйнахь кхерсташ йу хьан къиза гIера,

Йагайеш тхан йарташ, бошмаш а, хьаннаш.

Къизалло кхерийначу зударийн, берийн

Маьхьарша Іaдийна тхан лаьмнаш, Iаннаш.

Тхан халкъан масанне турпалхо вайна,

Даймахкахь тIехІотта кошан барз боцуш,

Байна уьш, хIоттийна чуртан тIулг боцуш,

Халкъан сий лардина къонахий майра…

– XIейт, гора, кIентий, йаI!