Римский синод 1 марта 499 г.[799]

Римский синод 1 марта 499 г.[799]

Synodus Romana a. 499.

Synodus Romana prima

Sub Symmacho papa episcoporum LXXII

Post consulatum Paulini uiri clarissimi, Kalendis Marti, in basilica beati Petri apostoli, synodo praesidente beatissimo papa Symmacho, Fulgentius archidiaconus dixit.

I. De congregata synodo ex praecepto papae Symmachi

Beatitudo uestra directis antehac per prouincias auctoritatibus frequentem Italiae sacerdotum synodum conuocauit, quorum praesentia in uestris uidetur oculis constituta. Nunc beatitudo uestra, quae ad ecclesiasticas indemnitates uel ad pacem totius ecclesiae pertinent siue concordiam dignetur tractabiliter ordinare.

Acclamatum est ab omnibus episcopis et presbyteris: Exaudi Christe! Symmacho uita! dictum est decies.

Cuius sedem et annos! dictum est nouios.

Ut facias rogamus! dictum est decies.

II. Interlocutio Symmachi ut episcopalis ambitus radicitus amputetur.

Symmachus episcopus ecclesiae catholicae urbis Romae dixit: Concilium dilectionis uestrae neglecta hiemis asperitate sollicitudo nostra pro ecclesiastica indemnitate specialiter congregauit, ut episcopalem ambitum et confusionis incertum uel popularem tumultum, quem per surrectionem diaboli usurpatione aliquorum tempore ordinationis meae constat exortum, communicato pariter tractatu in futurum possimus robuste ac uiuaciter amputare. Atque ideo caueamus in posterum, ne subversio disciplinae aut audacia praesumentium gestiat tentare similia, et pari adunatione tractemus, expressis scilicet sententiis sancientes quid circa Romani episcopi ordinationem debeat custodiri.

Uniuersi episcopi et presbyteri dixerunt: Ut fiat rogamus! dictum est decies.

Ut scandala amputentur rogamus! dictum est nouies.