Ut ambitus extinguatur rogamus! dictum est duodecies.

Exaudi Christe! Symmacho uita! dictum est sexies. Cuius sedem et annos! dictum est quinquies.

Ut de praesenti fiat! dictum est decies.

Symmachus episcopus dixit: Quoniam fraternitas uestra curam prouisionis nostrae suis exhortationibus incitauit, et parilem circa ecclesiae tranquillitatem dei nostri contemplatione animum praestat, sicut praefati sumus, deliberatione in praesenti habita, quid placeat ex omnibus uestris informate sententiis, quae in hoc uenerabili concilio per ecclesiastica recitentur officia. Cumque surrexissent et paulo post iterum consedissent, Aemilianus notarius synodi decreta vulgauit.

III. Ut si quis papa superstite pro Romano pontificatu cuique quolibet modo fauorem praestare conuincitur loci sui ordine priuetur.

Propter frequentes ambitus quorumdam et ecclesiae nuditatem uel populi collisionem, quae molesta et iniqua incompetenter episcopatum desiderantium generauit auiditas, ut exstinguatur futuris praesumptio tam perniciosa temporibus constituit sancta synodus, ut si presbyter aut diaconus aut clericus papa incolumi et eo inconsulto aut subscriptionem pro Romano pontificatu commodare aut pitacia promittere aut sacramentum praebere tentauerit, aut aliquod certe suffragium polliceri vel de hac causa priuatis conuenticulis factis deliberare atque decernere, loci sui dignitate atque communione priuetur.

Universa synodus surgens, Priuetur, acclamauit. Exaudi Christe! Symmacho uita! dictum est decies.

Hic pax cum Symmacho! dictum est quinquies.

Cuius sedem et annos! dictum est octies.

Pari seueritate feriendo eum qui hoc, uiuo sicut dictum est pontifice, quolibet modo fuerit ambiisse conuictus aut certe tentasse, omnibus pariter huius culpae reis anathematis poena plectendis.

Symmachus episcopus dixit: Ergo uniuersitati placet et ab omnibus recognoscitur uel probatur ista sententia?

Universa synodus dixit: Placet, et quod omnibus placet fiat.

IV. Ut si quis papa morte praeuentus non potuerit ante de sui successoris electione decernere is ordinetur antistes quem cunctus clerus aut pars maior elegerit.

Si, quod absit, transitus papae inopinatus euenerit, ut de sui electione successoris, ut supra placuit, non possit ante decernere, si quidem in unum totius inclinauerit ecclesiastici ordinis electio, consecretur electus episcopus; si autem ut fieri solet studia coeperint esse diuersa eorum de quibus certamen emerserit, uincat sententia plurimorum: sic tamen ut sacerdotio careat qui captus promissione non recto iudicio de electione decreuit.