Альбрэхт фон Валенштайн (1583–1634) – багемскі генералісімус, выбітны палкаводзец Трыццацігадовай вайны. Забіты ў Хебе 25 лютага 1634 году.

Джэймс Босуэл (1740–1795) – шатландскі пісьменнік і мемуарыст, чыя праца «Жыццё Сэмюэла Джонсана» (1791) доўгі час лічылася найлепшай біяграфіяй, напісанай па-ангельску.

Фотаздымак кабінетнага фармату – самы папулярны на той час фармат фотаздымка (прыкладна 4х5,5 цаляў), які з’явіўся ў 1867 годзе. Такія фотакарткі звычайна наклейваліся на кардон трошкі большага памеру і часта ставіліся на стол у рамцы – адсюль і назва фармату.

Замок Чаба – сувальдны замок (то бок замок, унутраная частка якога складаецца з пласцінаў (сувальдаў) з фігурнымі выразамі, якія для адкрыцця мусяць падштурхнуцца выступамі на бародцы ключа), вынайдзены ангельскім майстрам Джэрэмі Чабам у 1818 годзе. Лічылася, што яго немагчыма ўзламаць.

Місіс Тэрнэр – агульнавядома, што гаспадыню Холмса і Ўотсана завуць місіс Хадсан. Місіс Тэрнэр з’яўляецца толькі ў апавяданні «Скандал у Багеміі» і больш нідзе не згадваецца. Магчыма, маецца на ўвазе нейкая часовая служанка.

Водаправодная дымавая шашка – дымавая цыліндрычная шашка, якая ў віктарыянскія часы выкарыстоўвалася для пошуку цечы ў водаправодных трубах.

Нонканфармізм – сукупнасць ангельскіх рэлігійных арганізацый, што адышлі ад пазіцыяў англіканскай царквы (метадызм, баптызм і інш.). Шэрлак Холмс абірае для сябе ролю нонканфармісцкага святара, бо тагачасны закон забараняў выдаваць сябе за святара англіканскай царквы.

Джон Хэйр (1844–1921, сапраўднае імя Джон Фэйрз) – знакаміты ангельскі актор і адміністратар Гарык-тэатра ў Лондане. Паспеў сыграць таксама ў двух ранніх нямых фільмах.

Ольстэр – доўгае свабоднае мужчынскае паліто з грубашэрснага сукна, якое было ў модзе ў канцы ХІХ – пачатку ХХ стагоддзя.

Саюз рудых